أعطال الباور في الكمبيوتر وكيفية اصلاحها

الكاتب : Null
5.1K مشاهده
أعطال الباور في الكمبيوتر وكيفية اصلاحها

بتبقي صدمة لما تيجي تشغل الكمبيوتر وتلاقيه مش راضي يشتغل أو بيطلع معاك صفارة ومفيش حاجه بتظهر علي الشاشة،هذه المقالة بإذن الله حتكون شرح عملي لـ أعطال الباور في الكمبيوتر وتحديدآ في اللوحة الأم  ، وحظنا حلو اني حاشرح عطل حقيقي في ايسيهات الباور وسوكت البروسيسور حصل في جهازي بعد المقالة الأخيرة عن تنظيف الكمبيوتر.


في المقالة الأخيرة كانت عن تنظيف جهاز الكمبيوتر, اللي ما شافش المقالة تقدر تشوفها من خلال الضغط هنا ،المهم بعد ما انتهيت من تصوير الفيديو جيت اشغل الكمبيوتر ماشتغلش واكتشفت انه في مشكلتين حصلوا ،اول مشكلة كانت في بنات البروسيسور, وتاني مشكله كانت في ايسيهات الباور اللي كنت مغيرها من سنتين.

في هذه المقالة مش حاشارك بس مع حضراتكم حل المشكلة اللي حصلت في جهازي, ولكن حاساعدك تحدد العطل اللي موجود في جهازك لو الجهاز حصل فيه مشكلة باور, وكمان تصلحها لو انت عندك الادوات المناسبة واتدربت علي فنيات اللحامات واستخدام الأفوميتر في القياس.


أعطال الباور في الكمبيوتر:


أعطال الكمبيوتر تكون من حاجتين, إما اعطال باور أو اعطال داتا.

  • اعطال الباور:

معناها ان الجهاز مابيشتغلش معاك خالص, وأن مروحة البروسيسور ومروحة الباور سبلاي ما بتلفش ،او ممكن ان الجهاز يشتغل ثانيه ويفصل, وتلاقي المروحه بتلف نص لفه وتقف وده اللي حصل معايا.

  • اعطال الداتا:

فمعناها ان الجهاز بيشتغل باور والمراوح بتلف طبيعي ولكن مفيش حاجه بتظهر علي الشاشه أعطال الباور بصوره عامه سهله لانها مجموعة خطوات بنتبعها بالترتيب, ولكن ده مايمنعش إنها بتكون صدمة للمستخدم لأن اول حاجه بتييجي في باله ان البورده اتحرقت.

ولكن صدقوني الموضوع بيكون أبسط من كده بكتير, مع شوية معرفة واتباع للخطوات اللي حنقولها في هذه المقالة والفيديو حتقدر بنفسك تحدد عطل الباور في جهازك.


خطوات تتبع أعطال الباور في الكمبيوتر:


فحص كابل الباور:

أعطال الباور

اول حاجه حنعملها ان احنا نفحص كابل الباور اللي واصل للجهاز ونتأكد انه شغال وبيطلع 220 فولت ،ونتاكد ان توصيله بسوكيت الباورسبلاي تمام عن طريق انك تشوف الكابل بيطلع من السوكت بسهوله ولا ثابت مكانه ،لو لاقيته بيتهز حتحرك بينات سوكت الباور بالراحه علشان تلامس كويس مع الكابل وبلاش تضغط عليها جامد علشان ماتتكسرش معاك،لو المشكله ما اتحلتش يبقي حنحتاج نقيس الكابل ونتأكد انه موصل كهرباء.

ممكن نقيس الخرج بتاع الكابل بشكل مباشر ونتأكد انه مطلع 220 فولت أو اننا نقيس توصيل الكابل،لو حتقيس ال 220 اتأكد ان الكابل متوصل بالكهرباء, وانك ظابط الافوميتر علي الـ AC Volt علي التدريج الأعلي من 220 فولت وتتأكد ان الكابل مخرج الفولت علي طرف السوكيت.

ولو عاوز طريقه أسهل يبقي تقيس التوصيل ،حتفصل الكابل من الكهرباء وتستخدم الافوميتر علي وضع ال BUZZ ونقيس توصيل الأطراف، ونحاول نهز الكابل واحنا بنقيس, علشان نتأكد ان الكابل مش مقطوع أو بيعلق.

ولو عاوز تعرف اكثر عن قياسات الكابل, هذه المقالة فيها شرح تفصيلي لطريقة استخدام الافوميتر وطريقة قياس كابل الباور من هنا.


فحص الباور سبلاي:

أعطال الباور

أذا كان كابل الباور سليم يبقي حنفحص الباور سبلاي نفك الباور سبلاي من الكيسه خالص , ونوصل الكابل الاسود مع الاخضر عن طريق قطعة قصدير او سلك علشان نشغل الباور.

طبعآ ده ماينفعش في كل انواع الباور سبلاي, الباورات الاوريجنال بيكون ليها طريقه معينه في القياس ، ولكن غالبآ حتلاقي الباور عندك ATX ، نشغل الباور زي ما قولنا عن طريق توصيل السلك الاخضر مع السلك الاسود في سوكت الـ ATX وباستخدام الافوميتر نقيس فولتات الباور سبلاي.

حنظبط الافوميتر علي الـ DC Volt وتدريج اعلي من 12 فولت ، نوصل الكابل الاسود للافوميتر مع اي كابل اسود في الباور سبلاي والكابل الاحمر للافوميتر نقيس بيه الفولتات الاسود زي ما قولنا بيكون ارضي او صفر فولت.

السلك الاحمر في الباور المفروض يقيس 5 فولت والاصفر 12 فولت والبرتقالي 3.3 فولت, الأزرق -12فولت والأبيض -5 فولت ، لو في اي فولت من اللي قلنا عليهم مش موجود يبقي عندك مشكله في الباور سبلاي, حتجيب باور سبلاي تاني وتجربه علي الجهاز وان شاء الله حيشتغل.

ولو مش عاوز تدخل نفسك في حدوتة القياسات, ممكن من البداية تجرب باور سبلاي تاني علشان تتأكد من العطل, وده غالبآ اللي بنعمله في ورش الصيانة أنه بيكون عندنا باور سبلاي ماستر بنفحص بيه البورده.


فحص المذربورد:

أعطال الباور

اتأكدنا ان الكابل سليم, والباور سبلاي سليم الان هنفحص اللوحة الام ،حتفك المذربورد من الكمبيوتر و تدور علي العيوب الظاهريه في البورده.

العيوب الظاهرية مثل مكثف منفوخ, أو مكان حرق في البورده لو في مكثفات بايظه حتبقي هي دي المشكله, ولازم تتغير بنفس رقم المكثف سواء فولت او ميكرو فاراد.

لو في اي ترانزيستور باين عليه حرق حيبقي غالبآ هو اللي عامل المشكله ولازم يتغير هو ومجموعة الترانزيستور اللي جنبه ونفحص بالمره قاعدة البروسيسور ، في جهازي لما فحصت قاعدة البروسيسور لاقيت بنه متنيه, وكان لازم اعالجها الأول قبل ما أكمل شغل.

وممكن تحتاج عدسه علشان تكبر الصوره لو انت نظرك ضعف زيي من استخدام الكمبيوتر, او تستخدم الموبايل وتاخد صوره للسوكت علشان تكون الصوره اوضح بالنسبة لك وبعد تظبيط البنه المعوجه بجفت جربت الكمبيوتر ولكن لاقيت نفس المشكله موجوده.

كان عندي مجموعة مسوفيت باور انا كنت مغيرها من سنتين, بصيت عليهم لاقيت موسقيت منهم باين عليه حرق ،الموسفيت ده نوع من انواع الترانزيستور وحنلاقيه في دايرة الرامات ودايرة البروسيسور, وبيكون مسؤول عن تنظيم جهد البروسيسور.

بس قبل ما افك الموسفيت كان لازم اتأكد انه هو اللي بايظ, وانت كمان تقدر تعمل ده بنفسك انك تفك سوكت باور البروسيسور وتجرب البورده ، سوكيت باور البروسيسور ده بيكون سوكت بيتوصل له كابل من 4سلوك جاي من الباور سبلاي 2 منهم ارضي و 2 منهم 12 فولت
لو فصلته يبقي انت كده بتفصل دايرة الباور للبروسيسور عن باقي مكونات البورده.

شيلت كابل الـ 12 فولت وجربت لاقيت البورده شغاله باور عادي, وهنا اتأكدت ان المشكله من الموسفيت حتاخد صوره للبورده قبل ما تفك اي حاجه علشان الترانزستورات ترتيبها ما يتغيرش لما تيجي تركب.

وهنا حتواجهك مشكلة قطع الغيار لان اغلب ارقام الموسفيت دي مش بتتباع، ركبت الموسفيت وجربت البورده اشتغلت والحمد لله.


في حالة لم تحل المشكله:


لو كانت ماشتغلتش, كنت هاغير الكنترول والكنترول ده هو الايسي اللي بيتحكم في ترانزستورات الباور بتاعة البروسيسور طيب لو انت مريت بمجموعة المراحل دي والبورده ماشتغلتش. يبقي عندك مشكله في التشيب الرئيسية أو ال ITE او ترانزستور كاتم الفولت في البورده وده بيعتمد عامة علي خبرتك في مجال الصيانة.

وغالبآ حتلاقي مكثفات عليها شورت لما تيجي تقيسها تفك الترانزستور اللي انت شاكك فيه وتقيسه بره الدايرة لو فيه شورت يبقي هو المشكله ويتغير ،بالنسبة للـ ITE بيتغير عادي, اما التشيب الرئيسيه فمانصحكش بتغييرها لو بايظه بتغير البورده بالكامل.

دي باختصار اغلب مشاكل و أعطال الباور في المذربورد ايا كان نوعها.

موضوعات اخري قد تهُمك

Leave a Comment

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك، ولكن يمكنك الاعتراض إذا رغبت. موافق قراءة المزيد

Privacy & Cookies Policy