أعطال اللاب توب مختلفة وشبه مستحيل إني أقدر أحصر جميع أعطال اللاب توب في تدوينة واحدة ،حاحاول بإذن الله أجمع لكم كل أعطال اللاب توب اللي مرت عليا خلال 10 سنين من الشغل في المجال ده, واتكررت في أكثر من 2000 لابتوب عملت ليهم صيانة في مصر او السعودية.
وبكُل تأكيد مش حتقدر تصلح كل الأعطال دي بنفسك, إلا لو كنت فني متمرس وبتقدر تستخدم ادوات الصيانة باحترافية, ومتوفر لك قطع الغيار ،ولكن ده مايمنعش إنك حتقدر في نهاية التدوينة إنك تصلح بنفسك 70% من الأعطال اللي حنتكلم عنها فقط باتباعك للخطوات اللي حنقولها ، وحتندهش لما تعرف ان بعض الاعطال بتتصلح بمجرد انك تشيل البطاريه بطريقه معينه, او انك تضغط علي مفاتيح معينه في الكيبورد.
أعطال اللاب توب:
أعطال الباور:
ودي معناها ان اللاب توب ما بيوصلوش باور خالص ولما تضغط علي مفتاح الباور, مفيش اي لمبات بتنور ومفيش صفاره بتطلع من الجهاز, ومفيش حاجه بتظهر علي الشاشة.
دائرة الباور في اللابتوب, بتتكون من الشاحن والسوكيت ومكونات دايرة الباور الداخليه في اللاب توب ، 90% من اعطال دائرة الباور بتكون في الشاحن أو السوكيت
ابدأ بإنك تجرب شاحن سليم علشان تتأكد ان المشكله من الشاحن ولا لأ ، ولازم تتأكد ان الشاحن اللي بتجربه هو نفس الفولت ونفس الأمبير ونفس السوكيت, لأن الاختلاف في الفولت او الامبير ممكن يحرق دائرة الباور الداخليه في اللاب توب ولو اتأكدت ان العيب من الشاحن, وتحب تصلح الشاجن القديم, الفيديو ده فيه شرح تفصيلي لطريقة اصلاح الشاحن.
بالنسبة للسوكيت, ده بيكون تاني احتمال بالنسبة لنا, أوقات بيبان كسر علي السوكيت, وأوقات مش حتقدر تتأكد انه عطلان الا لما تفك اللاب توب وتقيس السوكيت من علي البورده.
لو الشاحن سليم والسوكيت سليم, حتبقي المشكله عندك في المذربورد ، ممكن تكون المشكله في سيليكونات دائرة الدخل او ماكسيم الباور وده الايسي الاساسي المسئول عن دائرة الباور في مذربورد اللاب توب، وممكن تكون المشكله في التشيبه الرئيسية, لو بايظه بتعمل قفله في البورده وبتكتم الفولت وبالتالي الجهاز مابيقومش باور وهنا أنصحك باللجوء لمتخصص علشان يقيس دايرة الباور .
أعطال الشاشة :
وهو ان الجهاز بيشتغل طبيعي ولكن في مشكله في ظهور البيانات علي الشاشة لو الشاشه مكسورة أو فيها برنت , افهم انها لازم تتغير، اما لو الشاشه فيها خطوط او بترعش, فاحتمال بنسبة 90% انها تكون بايظه, ولكن بيتبقي احتمال 10% ان سوكيت الشاشه يكون فيه مشكله أو ان شيلد الشاشه فيه قطع وده غالبآ بيحصل لو اللاب توب وقع, او اتخبط وحصل كسر في مفصلات الشاشة او في ال Frame وحصل معاه ان الشيلد اتقطع فيه سلك الفيديو ده فيه شرح تفصيلي لطريقة تغيير الشاشة واعطال الشيلد.
اعطال الكيبورد والتتش باد:
لو الكيبورد فيها زراير بتعلق, تقدر تفك الزار وتنظفه, وتخلي بالك وانت بتفك المفتاح علشان تعرف تركبه،أما لو الكيبورد مش شغاله خالص او فيها مجموعة مفاتيح مش شغاله, فاحتمال تكون بسبب سوكيت الكيبورد اللي متوصل بالبورد وده احتمال ضعيف ولكنه وارد وبيحصل, او ان الكيبورد باظت وحتحتاج تتغير.
وبالمره خليني اقول لكم علي 3 أعطال من الاعطال اللي دايمآ بتحصل وهي ان الشاشه تكون مقلوبه او ظاهره بالجنب العطل ده بيكون من الكيبورد, مش ان الكيبورد بايظه, ولكن ان حد ضغط بالغلط علي متاح كنترول + الت + الاسهم وده بيقلب الشاشه الحل انك تضغط علي كنترول + الت + السهم اللي فوق حتتظبط معاك الشاشه العطل ده غالبآ حيحصل لو عندك اطفال في البيت بيلعبوا علي الجهاز.
لو عندك مشكله في مفاتيح الكيبورد اللي فوق مش شغاله, اعرف ان الكيبورد مش متعرفه اللي حتعمله انك تدخل علي جوجل وتبحث عن موديل الكيبورد + driver وتدخل علي موقع الشركه المصنعه وتحمل التعريف وتسطبه.
أما لو التتش باد مش شغال فممكن يكون ملغي من التتش وممكن كمان التتش باد تكون ملغيه من مفاتيح ال Function ودي اللي انا اتكلمت عنها في الجزئيه اللي فاتت وقلت لكم انه بيكون في صف زياده في المفاتيح اسمها الـ Functions تقدر من خلالها تتحكم في اضاءة الشاشه او ترفع وتخفض الصوت او انك تعطل التتش باد.
برده من الاعطال اللي بتحصل ان جاك الصوت يتكسر جوه سوكيت الللاب توب في ناس كتير بتغير السوكت علشان السبب ده, أو تفكر انها تفك اللاب توب, ولكن اصلاح العطل أسهل من كده بكتير, كل اللي انت حتعمله هو انك تجيب دبوس وتسخنه, وبعدين تدخله في قلب الجاك المكسور, تستني ثواني لحد ما يبرد ويمسك في البلاستيك وبعدين تشد الدبوس السوكيت حيطلع معاك.
أعطال الريستارات وان الجهاز بيهنج:
الأول تتأكد ان المشكله مش سوفت وير او باد سيكتور أو فيروسات علي الهارد ” وده بانك تفحص الهارد باسطوانة الهيرن بوت وتحديديآ برنامج HDD Regenerator علشان تصلح البادات لو موجوده, وبعدين تنزل نسخة ويندوز جديدة من فلاش نظيفه تكون متأكد انه ماعليهاش فيروسات وبعد مال الويندوز ينزل تدخل علي الانترنت وتنزل برنامج Eset internet security وتسطبه وبعدين تحدث البرنامج, وتعمل سكان للفيروسات علي الهارد كله.
لو الحدوته دي ماظبطتش معاك يبقي المشكله هاردوير غالبآ العطل ده بيكون بسبب درجة حرارة البروسيسور أو عطل في التشيب الرئيسية او تنظيف الرامات او تغييرها.
اعطال التشيب الرئيسية انصحك تتعامل مع فني لانها بتحتاج اسلوب معين في التعامل معها, او التسخيين عليها ولكن ده برده مايمنعش انك تقدر تتأكد من العطل بنفسك لما تفك اللاب توب علشان تنظف المروحه ونتعرف مع بعض علي باقي الاعطال.
طريقة فك اللاب توب:
قبل ما تفك اللاب توب لازم تكون مجهز مكان فاضي وترتب فيه الأدوات اللي انت حتستعملها وخليني أأكد عليك ان فك اللاب توب مش أمر سهل وبيحتاج خبره فلو انت قررت تفك اللاب توب بنفسك لازم تكون حريص جدآ و أنصحك تبحث في اليوتيوب عن فيديو تعليمي عن طريقة فك وتقفيل اللاب توب بتاعك وبكل تأكيد تبحث بموديل اللاب توب.
وخليني كمان أأكد عليك ان لو قررت تفك اللاب توب لازم كل شويه تاخد صوره واضحه بالموبايل لمكان الكابلات والمسامير والتوصيلات علشان لو اتلخبطت تقدر ترجع للصورة حنحتاج بعض الأدوات منها:
- مفك صليبه سن رفيع .
- ملقاط او جفت.
- فتاحة لابتوب.
- معجون حراري للبروسيسور .
- فرشه.
- Q20 .
- وعلبة علشان تحط فيها المسامير.
أول حاجه حنفكها هي البطارية ودي فكها سهل حتلاقي عندك مفتاحين بسوسته واحد مرسوم عليه قفل والتاني مرسوم عليه بطاريه تحركهم وتطلع البطاريه نفك كل المسامير اللي موجوده في ظهر اللاب.
نطلع الـ دي في دي رايتر واي قطع ممكن تطلع معانا أو تتفك, وماتنساش كل شويه تاخد صوره بالموبايل وانت شغال علشان لو اتلخبطت في التركيب ترجع لها, ولو تحب تشارك معانا الصوره علي اسنتغرام, اعمل لي منشن علي هاشتاج ماتريكس219.
حتلاقي قدمك كابل الكيبورد والتتش باد, حتفكهم هما واي كابلات متوصله علي البورده من تحت, وبالمره فك الرامات ونظفهم بسنفره ناعمه او استيكه وفرشه واركنهم علي جنب.
ملاحظة:
بعض انواع اللاب توب حتلاقي فيها مسامير تحت البطاريه بتتفك الأول هي ومسمارين في ظهر اللاب توب وبعدين بتفك الوش اللي فوق المفاتيح وتطلع الكيبورد وتفك المسامير اللي تحتها علشان تقدر تفك اللاب وغالبآ في الانواع دي حتلاقي المروحه والبروسيسور تحت الكيبورد مباشرة وعلشان كده انا قلت لك تدور علي موديل اللاب بتاعك علي اليوتيوب وتشوف طريقة الفك بتاعته بالتفصيل لأن طريقة الفك بتختلف من لاب للتاني ولكن ده مايمنعش ان المبدأ واحد مابين كل اللابتوبات.
نرجع تاني للاب توب اللي معانا عن طريق الفتاحة, نفصل وش اللاب توب عن الظهر نبدأ من المنطقه اللي فيها ال دي في دي وخلي بالك اوقات الدي في دي بيكون تحته مسمار او اتنين لو لاقيت مسامير فكها علشان تفك الظهر.
بعد ما نفك وش اللاب توب اصبحت الكيبورد قدامنا هي والتتش باد, لو حاجه منهم فيها مشكله ومحتاجه تتغير وبالنسبة للمروحه في كتير من انواع اللاب توب حتضطر كمان تفك البورده علشان توصل للمروحه وعلي الرغم من اماكن المسامير بتكون متعلمه بسهم علي البورده, ولكن ده مايمنعش انك تاخد صوره للبوره بالموبايل علشان لو اتلخبطت في التقفيل نفك المسامير واي كابلات واصله علي البورده وممكن كمان تحتاج تفك بوردة الـ كارد ريدر.
وخد بالك كتير حتلاقي مسمار جنب المروحه وتحديدآ تحت كابل الشاشه لزم تفكه ولو البورده ما طلعتش معاك دور تاني علي المسامير وما تستعجلش لأنه اكيد في مسمار مستخبي وانت مش شايفه.
الاعطال والصيانة:
طبعآ الأعطال في البورده كتير جدآ ومحتاجه حلقات كامله علشان نشرح كل عطل بالتفصيل ولكن خليني اقول لك 3 أعطال أساسية لابد حتقابلك لو عندك مشكله في الوقت والتاريخ ورساله بتظهر لك كل ما تفتح اللاب توب تقول لك اضغط إف 1 اعرف ان بطارية اللاب توب الداخليه وحتحتاج تتغير.
لو عندك مشكله في البايوس والجهاز مابيفتحش خالص وتحديد العطل كان ان البايوس محتاج شحن الشريحه دي بتتفك وتتوصل بجهاز برمجه علشان تتشحن ومعني كلمة تتشحن هو انها يتحمل عليها برنامج البايوس اللي بيتحكم في الجهاز.
لو عندك مشاكل في حرارة البروسيسور يبقي لازم تفك المروحه تنظفها كويس وتنظف مشتتات المبرد وتحط معجون حراري علي البروسيسور فك وتنظيف مروحة اللاب توب سهل حتفك ال 4 مسامير بتوع المبرد وتفك فيشة المروحه تنظف المبرد والبروسيسور تفك مسامير المروحه تطلع الريش وتنظف قلب المروحه مع رشتين كيو توينتي وتقفل من تاني وقبل ما تركب المبرد حط معجون حراري علي المبرد والبروسيسور وماتكترش ده مش كتشب.
أما لو عندك مشكله في كارت الشاشه انه بيسخن زياده عن اللزوم او انه فاصل ومفيش حاجه بتظهر علي الشاشه فانت حتحتاج تسخن علي التشيبه الرئيسيه اللي بيكون فيها كارت الشاشه وفي الحالات دي زي ما قلنا حتحتاج تستعين بمتخصص عنده خبره في اصلاح كروت الشاشه دي الصيانات اللي انت ممكن تعملها في البورده.
اعطال الشاشه :
اعطال الشاشه اما كابل و مفصلات او تغيير شاشه واي حاجه من دول حتستدعي اننا نفك الشاشه وبالمره لما تفك الشاشه حتكون وصلت للكاميرا فتقدر تغيرها لو فيها مشكله، تفك مسامير المفصلات وارد انك تلاقي تحت مسامير المفصلات قاعدة مسمار مش مربوطه كويس او مكسورة, حتركبها بحرص باستخدام صمغ او معجون ايبوكسي وتعمل حسابك انك تحط الايبوكسي فقط علي مكان الكسر علشان مايضايقكش لما تيجي تقفل الجهاز.
حتلاقي ستيكر مربع او مدور في اركان الشاشه تشيله حتلاقي تحته مسمارين او اكثر, تفكهم و بالفتاحه تفك الوش والظهر بتاع الشاشه
وبكده اصبحت الشاشه قدامك هي والكاميرا لو الشاشه او الكابل حاجه منهم محتاجه تتغير لسبب من الاسباب اللي قلناهم في اول التدوينة حتغيرها وقبل ما تقفل تاني أكد علي إن مسامير المفصلات مربوطه كويس وبالمره رش بختين من كيو 20 علي المفصله علشان تسهل حركتها.
ولو كنا استعملنا الايبوكسي ننتظر عليه ربع ساعه علشان ينشف وزي ما فكينا الشاشه زي ما حنقفلها ونقفل باقي اجزاء اللاب توب من تاني ولو حصل واتلخبطت في توصيل الكابلات او اماكن المسامير ارجع للصورة اللي صورتها وشوف اماكن التوصيل.
الموضوع سهل وممتع خاصة لو حتغير قطعه من قطع اللاب توب زي الشاشه او الهارد او الرامات او حتي سوكيت الباور أما لو المشكله عندك شحن بايوس او تشيب رئيسية أنصحك تستعين بفني.