قهوة الغلبان في شبين الكوم, مكان لازم تزوره لو زرت محافظة المنوفية وتحديدآ مدينة شبين الكوم “عاصمة المحافظة”.
في زيارتي لمدينة قويسنا في محافظة منوفية تصادف تواجدي في هذا المكان, أساسآ ماينفعش تزور شبين الكوم وماتلاقيش نفسك في المكان ده,لأسباب كثيرة جدآ حاتلكم مع حضراتكم عنها بالتفصيل, ولكن بداية وجب التنويه علي أن كل ما أشاركه مع حضراتكم من اراء حول رحلتي في ” البحث عن مصر ” هي اراء شخصية من واقع تجاربي في هذه الرحلة, وليس من الضرورة ان تعبر عن الحقيقة كاملة, ولكنها تصف كيف رأيت مصر في رحلتي.
موقع قهوة الغلبان :
مكان قهوة الغلبان في موقع جغرافي متميز جدآ, بجوار أهم المصالح الحكومية والمؤسسات الهامة في مدينة شبين الكوم, ومنها :
- مجلس مدينة شبين الكوم.
- محكمة شبين الكوم الابتدائية.
- محكمة الأسرة.
- مركز شرطة شبين الكوم.
- سنترال شبين الكوم.
- المصرية للاتصالات.
- بنك مصر.
- البنك الزراعي.
- مطرانية مارجرجس.
- مكتب الجوازات.
- مستشفي الهلال للتأمين الصحي.
كل هذه المؤسسات وأكثر تحيط بـ قهوة الغلبان. ويكفي وجود مجمع المحاكم ومركز الشرطة ومستشفي التأمينات, كي تجد في هذه القهوة العديد من فئات الشعب المصري قاطني محافظة المنوفية.
لماذا قهوة الغلبان :
قهوة الغلبان يوجد بجوارها مطعم الغلبان, يعني باختصار تطلب السندوتشات وحتنزل لك علي القهوة مع المياه وبعدها تشرب الشاي الجميل, ولو ليك في الشيشة حتنزل لك الشيشة النحاس القديمة ” عن نفسي ماشفتهاش من وقت التسعينات غير في بعض الاماكن في صعيد مصر”.
هي مش خدمة خمس نجوم, ولكن هناك حتحس انك عايش احساس مصر في زمن المماليك وماقبل ثورة 52, مع اختلاف أشكال الناس.
حتي أشكال الناس وطريقة لبسهم وتعاملهم بتنقل لك احساس غريب. حتلاقي شباب الجامعة او المدارس اللي لابس مودرن, وحتلاقي اللي لابس جلاليب, وحتلاقي اللي لابس بناطيل وبدل السبعينات.
العادي هناك انك حتلاقي شاب في العشرينات, بيعرض عليك تشتري عطور شعبية, وراجل طيب قدام القهوة بيمسح أحذية ” سألته علي مكان فماترددش انه يساعدني وكان ناقص يوصلني”
اسعار السندويتشات والمشاريب في قهوة الغلبان :
الاسعار شعبية جدآ, يعني بـ 5 جنيه ممكن تفطر, واسعار المشاريب كذلك الشاي بـ 2 جنية والشيشة يـ 2 جنية. ده غير المعاملة الجميلة من العاملين في القهوة, اللي بيحسسك انك ضيف مُرحب بيه, الوجه البشوش والهزار وقت ماتيجي تحاسب. ده غير الكرم في المعاملة علي عكس ماهو شائع إن المنايفة بخلاء ” حقيقة طوال اقامتي في المنوفية لم أري سوي الكرم من أهل هذه البلد”
صور قهوة الغلبان :
لم أتمكن من التصوير لان الموبايل كان فاصل شحن, الكاميرا اللي معايا كانت احترافية, فكان صعب اطلع الكاميرا واصور لان المكان أمام المحكمة مباشرة وممكن الموضوع ده يسبب لي مشاكل, ولكن جبت لكم كام صورة للمكان من خرائط جوجل, وكمان لقطت كام صورة بالتابلت.
قهوة الغلبان – الموظفين
