Matrix219 Home | كيف تتعامل في حالة غرق السيارة أو أن غمرتها المياه بالكامل | عصام غنايم
مقالات متنوعة

كيف تتعامل في حالة غرق السيارة أو أن غمرتها المياه بالكامل | عصام غنايم

غرق السيارة
غرق السيارة

أو غمرها بالمياه, سواء في حادث أم نتيجة للسيول والأمطار الغزيرة, هو موقف صعب جدآ ومن الأمور المزعجه جدآ لأي من مستخدمي السيارت, والتعامل السئ مع هذا الأمر قد يكلفك مبالغ طائلة.

واليوم جئتكم بموضوع متكامل شاركه معنا خبير السيارات, الزميل عن طيفية التعامل مع غرق السيارة , واليكم الموضوع كاملآ كما كتبه المهندس علي صفحته الشخصية بموقع الفيس بوك.


 [ غرق السيارة ]


غرق السيارة

الفتره اللى فاتت دى جاتلى اسئله كتيرمن اصحاب السيارات الغارقه ( كان الله فى عونهم ) عن ايه التصرف الصحيح مع سيارتهم الغارقه فى مياه الأمطار

ناس سألت قبل ما تتصرف ( فبنقدر نلم الخساره قدر المستطاع )
وناس اتصرفت غلط وراحت ل ( صنايعيه لا تفقه شيئ ) و وقعوا فى غلطات كلفتهم آلافات الجنيهات من الخساره

لذلك ولأهمية الموضوع هنتكلم انهارده عن الخطوات المفروض اتباعها عند غرق السيارة

{{{{ طبعا كلامى هيكون من خلال دراستى وخبرتى العمليه و صيانتى بنفسى للسيارات التى تعرضت للغرق وإعادة تشغيلها تانى كالجديده بدون مشاكل بأذن الله }}}}

هنقسم الموضوع لجزئين مهمين

1-  ما قبل غرق السيارة :

وده هيكون فى حالتين

الحاله الأولى ( وانت جوه العربيه )

وهى دايره وانت سايقها وفجأه لاقيت قدامك بركة ميه او شارع مملوء بالماء
الأصح طبعا انك ترجع

طيب لو مجبر تعدى ؟

1 شغل الأنتظار ونور الشبوره امامى وخلفى ( لو وجد )

2 هتحاول تدخل الميه ببطئ وهدوء جدا عشان سببين مهمين
أ تبرد الأجزاء الساخنه من العفشه والموتور تدريجيا حتى لا تتسبب فى تلفهم بالتبريد السريع
ب عشان مترفعش مستوى الميه اكتر مع السرعه وتغرق الأجزاء الكهربائيه العلويه من الموتورمما يتسبب بتوقف السياره

3 متحاولش تمشى فى نص الطريق ( عشان البلاعات والنقر دايما بتبقى فى النص فى بلدنا العزيز ) امسك شمالك على قد ما تقدر

4 امشى فى الميه بس لحد ارتفاع تحت الباب مباشرة ( اياك تدخل الميه جوه العربيه هتزعل جدا )

5 اول ما الأزمه تخلص ( ارفع العربيه فى اى بنزينه واغسل بطنها جيدا بالماء ثم رش كل مفصلات العفشه بسولار وزيت او ( WD-40 ))

الحاله الثانيه ( وانت خارج العربيه )

قاعد فى بيتك والأمطار غزيره جدا وبدأت تغمر العربيات فى الشارع
هتعمل ايه ؟؟؟

1 تحاول تنقل العربيه لأرض مرتفعه ( فى اى شارع تانى او حتى على الكورنيش او فى اى مكان غير مغمور وارضه مرتفعه )

2 لا يوجد مكان مرتفع وكده كده العربيه هتغرق
{{{{{ هام جدا جدا جدا }}}}}
( شيل البطاريه من العربيه او حتى اضعف الأيمان تفصل كابلات الكهرباء عن البطاريه )

3 مقدرتش تتصرف ولا توصل للعربيه ولا تفصل البطاريه ووقع المحظور والعربيه غرقت بالكامل فى الماء

ملحوظه
(( لو ارتفاع الميه بداخل السياره وصل لتغطية التابلوه فقط فكده هى غرقت بالكامل بالفعل باقى الأرتفاع لحد السقف اصلا لا قيمة له ))

وده اساس موضوعنا انهارده

هتعمل ايه ؟؟؟؟؟؟؟؟؟؟؟؟؟؟؟

هتتبع الخطوات الآتيه

1 هتفصل البطاريه وتخرجها بره العربيه

2 اياك وحذارى تحاول تدورها او حتى تفتح الكونتاك

3 لو العربيه مانيوال هتمورها وتنزل اليد وهتحملها على ونش

4 {{{{{ هام جدا جدا جدا }}}}} لو العربيه اوتوماتيك هتلاقى جنب عصاية الفتيس لتح غطاء صغير خالص اسمه ( release )هترفعه لفوق وتدخل مفك عاده او مفتاح فيه وتحرك دراع الفتيس للوضع N قبل ما تحاول تقطرها او حتى تحملها ( لو عملت غير كده غالبا هتكسر الفتيس وتجيب لنفسك مصيبه جديده

5 هتفكك صالون العربيه بالكامل وتطلعه بره ( كراسى ,دواسات , فيبر عتب وأوايم , فرش ابواب ,تابلوه , عدادات , مفاتيح , لباد ارضيه ,هتفكك الشنطه والفرده الأحتياطى والعده ودرج التابلوه , وهتفتح طبب الأرضيه الكاوتش كمان )

6 {{ هام جدا }} هتغسل العربيه والموتور والفرش والدواسات وكل ملحقات العربيه بالكامل جيدا بماء ومنظف سائل ثم بالماء النظيف ( مياه الأمطار مع تراب الأرض بتكون فيها نسبة املاح عاليه جدا بتاكل كل شيئ فى العربيه وبتسبب عفونه )

7 هتنفض كل ما سبق بهواء بضغط عالى لتسريع التجفيف
هتنشر الفرش والأرضيه والدواسات فى مكان مشمس جيد التهويه بعيدا عن الأمطار ( غالبا بيحتاجوا من 3 ايام لأسبوع للجفاف التام وبخاصه الكراسى )

8 {{{{ اخطر جزء }}}} هتفكك كل فيش ضفيرة العربيه جوه وبره موتور وتابلوه وابواب وحساسات كل الفيش بلا استثناء وهتغسلها بميه مقطره كويس جدا واللى بان عليه اكسده هتنضفه بفرشه ثم تنزفهم بهواء مضغوط ثم تنضفهم بمنظف الكترونيات وليكن ( AKAI او ABRO ) وترنجع تنفضهم بهواء مضغوط وتركبه تانى

9 هتفك العدادات والكاسيت والشاشات وكل الحساسات اللتى غمرت بالماء وبالأخص ( ىحساست ال ABS و حساس الكرنك والكامه ) وتعمل فيها كل ماسبق

10 مكن ومجارى الزجاج والكوالين والمفصلات كلها هتتنضف وتترش جيدا ب ( WD-40 )

11 {{{{ هام جدا جدا }}}} هتفك كومبيوترات السياره ( السيارات الحديثه ليها اكتر من كومبيوتر ) وتطلعها بره وتفك غلافها وتطلع بورداتها بره وتغسلها كويس جدا بماء مقطر من الصيدليه ( بتاع الحقن ) وتنشفها بهواء مضغوط ثم تغسلها جيدا بمنظف الكترونيات بدون زيت ثم تجففها بهواء مضغوط ساخن ( هوت جن او سيشوار ) وترجع تقفلها بالكامل تانى

12 الموتور اللى اهملناه من البدايه

ليه سبت الموتور للآخر ؟؟؟

لأنه وعلى عكس ما يظن البعض هو آخر همى
اهم حاجه عندى هى دواير الكهرباء
اما القطع الميكانيكيه للموتور فلا اخاف منها

الموتور ده ليه ترتيبات خاصه كالآتى

1 هتغير كل الفلاتر بلا استثناء

2 هتغير البوجيهات وسلوكها

3 هتغير الزيت وفلتره

4 هتنضف كل فيشه وحساساته كما اوضحنا سابقا

5 هتنضف البوابه وغرف الحريق بمنظف كربراتير ثم ب WD-40 ثم بهواء مضغوط جيدا وتتأكد من خلو غرف الحريق من اى سوائل قبل اول دواره

6 هتفك الدينامو والمارش ويتعملهم صيانه شامله من تنضيف وتشحيم وتغيير بلى وشاربون

7 هتشيك على بلى شدادات التكييف والموتور وتتاكدمن دوارنهم بنعومه والأصح تغييرهم

8 تغيير سيور العربيه بالكامل ( للأمان فقط )

9 تتأكد من سهولة دوران الكومبريسور

كده الموتور خلص نرجع لباقى خطوات موضوعنا

13 قبل ما نبدأ فى تقفيل العربيه تانى لازم نعمل الآتى

1 نتأكد ان كل مكونات العربيه جفت بالكامل ( وبخاصه الفرش والكراسى )

2 هتفحص جسم العربيه من الداخل جيدا بحثا عن اى بدايات برومه وتعالجها قبل ما تبدأ فى تقفيل السياره

3 هنتأكد من توصيل كل فيش الضفيره

4 هنوصل كومبيوتر كشف اعطال ونركب البطاريه ونفتح كونتاك فقط ونقرأ هل يوجد اعطال قبل الدواره ونبدأ بعلاجها ومسحها

5 هندور العربيه مع ملاحظة اى اصوات غريبه او روايح

6 غالبا العربيه مش هتدور من اول لقطه ( ده طبيعى ) اصبر عليها وحاول مره وتانيه لحد ما تدور

الحمد لله العربيه دارت بأمان

14 هتكشف على العربيه تانى بجهاز كشف اعطال للتأكد من عدم تسجيل اعطال

15 هتتأكد من سلاسة تشغيل زجاج الأبواب والمقابض والكوالين ووحدات الرفع والسنتر قبل ما تقفل فروشات الأبواب والشنطه

16 كل ما سبق تمام وبخير
هتبدأ تقفل العربيه بعكس الخطوات اللى فكتها بيها

حمدلله على السلامه

طبعا الموضوع طويل ومتعب وشاق
بس ما باليد حيله لأننا كمصريين العربيه بالنسبالنا مش رفاهيه ولا سلعه استهلاكيه لأ دى سلعه معمره

(((( فى اوروبا والدول المتقدمه ))))
بيعدموا العربيات اللى تعرضت للغرق لأنها فى الغالب بتكون غير صالحه وبيسموها ( DAMAGED FLOODED CARS )
وده حصل بالفعل فى مصانع هوندا باليابان بعد التسونامى و( لعربيات زيرو ) زى ما باين فى الصور

مشكلة الموضوع انه محتاج تعمله بنفسك لو عندك وقت وخبره كافيه
ولو مش عندك الخبره
على الأقل هتبقى عارف ايه التصرف السليم علشان مفيش حد يعملك شغل غلط فيكلفك خسائر آلاف الجنيهات او يجرب فيك شغل غلط وبدون خبره منه

بكده نكون خلصنا موضوعنا
ارجو ان اكون افدتكم وساهمت بشكل لو بسيط فى مساعدتكم و الوقوف بجانبكم فى محنتكم في حالة غرق السيارة.

اخوكم / عصام غنايم


أضف تعليق

انقر هنا لإضافة تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.