لماذا يجب عليك تنظيف الكمبيوتر من الداخل كل فترة

الكاتب : Null
1.7K مشاهده
لماذا يجب عليك تنظيف الكمبيوتر من الداخل كل فترة

هل تعلم إن اهمالك تنظيف الكمبيوتر الخاص بك ممكن يتسبب في حرق الباورسبلاي او اللوحة الأم؟ هل تعلم أيضا ان بطئ تحميل الجهاز او صفارة الرامات أو ان الجهاز يعمل ريستارت كل شويه او إنه ما يعرض صورة خالص علي الشاشه دي كلها أعطال بيكون سببها تراكم الأتربه في المكونات الداخليه للكمبيوتر هو السبب فيها غالبآ.

وأغلب أعطال الكمبيوتر بتكون تنظيف, بس فني الصيانة لو قال لك كده حتكرمش 20 جنيه في ايدك وتعطيها له وكأنه بيشحت منك, فبالتالي بيقول لك البورده كان فيها شحن بايوس, علشان ماتحورش معاه كتير،وبالتبعيه لما البورده يكون فيها مشكله حقيقيه زي الموسفيت او الكنترول او حتي تغيير مكثفات, الفني بيكبر دماغه ويقول لك الجهاز عاوز يغير بورده.

طبعا الهدف من هذه التدوية مش إني أقلل من قيمة الفنيين, ولكن كان لازم أوضح لحضرتك إن تحديد المشكله في حد ذاته هو شئ يستحق مقابل مادي, وإن مقابل الصيانه عمره ما كان ثمن قطعة الغيار اللي بتتركب.

في هذه المقالة سوف نقوم بشرح تفصيلي لصيانة الكمبيوتر اللي تقدر تعملها بنفسك في البيت, ولكن ده مايمنعش إنك تدي العيش لخبازه, أما لو كُنت من هواة الالكترونيات والتصليح والفك والربط فأهلا بيك في مجتمع ماتريكس219.


تنظيف الكمبيوتر:


مبدئيآ حضرتك محتاج تنظيف الكمبيوتر بتاعك كل شهرين علي الأقل, ولو عندك لابتوب لازم يتنظف كل 6 شهور،حد حيقول لي الجهاز شغال معايا من سنين ومفيش فيه مشكله, حاقول لك ده من ستر ربنا عليك, مش شطاره منك ولا إن الجهاز بتاعك سوبر كمبيوتر واذ ربما الجهاز يكون بطئ معاك أصلا وفيه مشاكل بس انت اتعودت علي بطئ الجهاز ومش ملاحظ ان فيه حاجه غلط, وده معناه إن حضرتك بعد تنظيف الكمبيوتر حتلاحظ فريق كبير في الأداء وخد كلامي ثقه.

خلينا نتفق الأول ان الكمبيوتر فيه مكونات درجة حرارتها بترتفع مع شغل الجهاز, والمكونات دي هي البروسيسور و الترانزيستورات والتشيبات،ده بالاضافه للحراره اللي بتطلع من الهارد ديسك وكارت الشاشه لو عندك كارت شاشه خارجي،وكمان خلينا نتفق إن تقنيات التبريد اتطورت كتير عن مجرد مروحه ومبرد بيتثبت علي البروسيسور, وظهرت تقنيات حديثه زي التبريد المائي أو تبريد الفريون للمعالج أو كارت الشاشه.

وللمره اللي مش حتكون الأخيره خلينا نتفق إن أغلب الأجهزه بتاعتنا هي أجهزه ضعيفه بتعتمد علي التقنيات القديمه في استخدام الهواء لتبريد المعالج ووحدة المعالجه المركزيه.

وطالما بنتكلم عن الهواء فلازم يكون مع الهواء شوائب إنت مابتشوفهاش بالعين المجرده, ومع وجود الرطوبه ذرات التراب دي بتتجمع علي المبردات وبتكتم مروحة البروسيسور, أو بتدخل جوه المروحه وتبطأها أو توقفها،ولما المروحه بتقف بتضيف سخونيه أكثر للجهاز نظرآ لمقاومتها للدوران واللي بيتولد عنها حراره في ملفات المروحة،لذالك نحتاج كل فتره تنظيف الكمبيوتر أو اللاب توب.


ما هي المشاكل التي تحدث من عدم الاهتمام بنظافه الكمبيوتر:


تنظيف الكمبيوتر

  • الجهاز يفصل باور فجأة:

لو الكهرباء قطعت والجهاز شغال, تيجي تشغل الجها بعد كده مايشتغلش أو تبقي شغال في امان الله وتشم ريحة شياط من الكمبيوتر وتلاقي الكمبيوتر فصل كهرباء ومش راضي يشتغل.

اللي بيحصل ان مروحة الباور سبلاي بتكون عطلت, وبالتالي المكونات الداخليه للباور سبلاي بتسخن, وده بيأدي لتلف المكثفات أو منظمات الجهد وبالتالي الباور سبلاي بيتحرق.

مقالات تهمك عن الباور سبلاي:

  1. اعطال الباور سبلاي الشائعة وطرق اصلاحها بالتفصيل : فيديو وشرح عملي
  2. Power-supply | حلول مشاكل وأعطال الباور سبلاي
  3. ازاي تصلح الباور سبلاي بنفسك
  • الجهاز بيطلع صفارة رامات ومايرضاش يفتح, أو يفتح وويهنج أو يعمل ريستارت:

وده بيكون بسبب التراب اللي مابين المعالج و سوكيت المعالج , او اللي بين الرامات وبين سوكت الرامات ويسبب عدم جودة توصيل التيار مابين البروسيسور والبورده او الرامات وسوكت الرامات, ايسيهات الباور المسئولة عن الرامات والمعالج بتسخن وبتتحرق, وتبقي كده دحلت في حوار تاني ولازم فني متخصص يفحص البورده ولو جهازك اوريجنال والايسهات مش موجوده حتضطر تغير البورده بالكامل.


ما هي المكونات التي نحتاج الي تنظيفها؟ وما هي مراحل تنظيف الكمبيوتر:


كل حاجه داخل جهاز الكمبيوتر بتتنظف مثل مروحة البروسيسور, مروحة الباور سبلاي, مروحة الكيسه , المرزيورد وكل السوكيتات اللي موجوده عليها, بالاضافه للكيسه والكابلات علشان نجمع الجهاز من تاني علي نظافه.

فك مكونات الكمبيوتر :

  1. حنحتاج مفك عادي ومفط صليبه وممكن نستخدم المفك الكهربائي ولكن خليك حريص من الاهتزازات لو الهارد ديسك راكب.
  2. حنحتاج فرشه و قطعة قماش وكمان بلاور لو موجود.
  3. لازم تكون مجهز معاك كمان معجون حراري : وتخلي بالك في معجون حراري كتير مضروب في السوق, وده تعرفه من اللزوجه بتاعته, المضروب بيكون اقرب للسائل عن المعجون.
  4. حنحتاج منظف أكاي جاف أو اي ماده كحوليه مايكونش متضاف عليها مياه ولو موجود WD40 او Q20 يبقي كده انت جهزت كل حاجه.
  5. ونبدأ نفُك الجهاز نفك Cover الكيسه, وبعدين نفك كل الفيش او الكابلات اللي موجوده قدامنا.
  6. الفيشه اللي حتفكها تعرف مكانها, ولو حتتلخبط حتستعين بقلم ماركر وتاخد علامه مميزه علي كل فيشه تفكها. وبالمثل مع الكابلات.
  7. نفك مسامير الباور سبلاي ونطلعه بره الكيسه.
  8. نفك الباور سبلاي نفسه وده بيكون متثبت غالبآ باربع مسامير.

تنظيف المكونات:


مروحة الباور سبلاي:

تنظيف الكمبيوتر

ننظف البورده بالفرشه او البلاور, ونفك المروحه وننظفها وبالحديث عن المروحه خليني الفت انتباهك ان مش كل المراوح بتتفك الريش بتاعتها, وتعرف الموضوع ده بانك تشيل الاستيكر المدور اللي علي المروحه وتبص تحته, لو لاقيت حاجه تتفك فكها, وغالبا حتلاقي جلدة أمان وبعدها أفيز بلاستيك وحلقه او ثلات حلقات كاوتش ، بيتفكوا كلهم وتسقط ريشة المروحه،وخلي بالك تحطهم في علبه صغيره علشان حجمهم الصغير بيكون سهل انهم يضيعوا وحترجع تلف حوالين نفسك علشان تقفل المروحه من تاني.

الجزء ده اسمه الكور بتاع المروحه او قلب المروحه حترش عليه سبراي WD40 او Q20 او أكاي, اللي موجود منهم عندك وبعدين تنظف الكور بمنديل, المنديل حيطلع معاك وسخ كتير, تستمر في التنظيف لحد ما ماتلاقش وسخ بيطلع في المنديل.

تنظف باقي اجزاء المروحه وبعدين تقفل كل حاجه زي ما فكيتها،وقبل ما تقفل الغطاء بتاع الكور, حترش رشتين سبراي زيتي, زي اكاي او wd40 علشان يسهل حركة المروحه، ولو المروحه ما كانتش من النوع اللي بيتفك حترش جوه قلب المروحه سبراي, وده اللي حتقدر تعمله ،تركب المروحه في الباور سبلاي وتقفل الباور سبلاي من تاني وتركنه علي جنب.


تنظيف اللوحة الأم:

تنظيف الكمبيوتر

حتفك الرامات ومروحة البروسيسور, وتسيب البروسيسور علي البورده راكب علشان قاعدة البروسيسور ماتبوظش معاك بالغلط نفس اللي عملناه مع مروحة الباور سبلاي حنعمله مع مروحة البروسيسور وكمان لازم ننظف المبرد كويس لانه غالبآ حتلاقي بلاوي،حننظف سوكت الرامات وسوكتات توصيل الكابلات والسلوك بفرشه, ونمر علي البورده بالمره بالفرشه ننظفها.

نييجي بقي لسوكت البروسيسور,حتفك البروسيسور بالراحه وتنظفه من تحت وتمرر صابعك بشويش علي بنات البروسيسور, وخلي بالك ان البنات ليها اتجاه علشان ماتتناش معاك ،اوعي تنظف البنات بالفرشة او قطعة قماش او منديل لانك كده حتبوظ قاعدة البروسيسور.

ممكن تستعين باكاي جاف وترشه علي السوكت وتسيبه ينشف, وبعد كده تمرر صابعك علي البنات, مجرد انك تلمسها علشان تشيل اي بواقي لمادة التنظيف وتقفل البروسيسور من تاني في القاعده بتاعته ونركن البورده علي جنب مع الباور سبلاي.


تنظيف الكيسه والكابلات والهارد:

لو معاك بلاور خدهم في اي مكان بره ونظفهم وبعدين مرر عليهم فرشه او قطعة قماش علشان تتخلص من بواقي التراب.


تقفيل الجهاز من تاني وتجربته:

نقفل كل حاجه من تاني زي ما فكيناها من الكيسه واخر حاجه هي مبرد البروسيسور ومروحة البروسيسور وطبعآ قبل ما تركبهم لازم تحط معجون حراري ماتغرقش الدنيا معجون علشان مايسيلش في سوكت البروسيسور كفايه نقطتين تلاته علي البروسيسور وزيهم علي المبرد وقفلل المروحه بتاعتك.

مبروك, انت كده قمت تنظيف الكمبيوتر ورجع جديد حنفتح الجهاز وندخل علي البايوس ونشوف حرارة البروسيسور في الرينج المناسب ولا لأ. المفروض ماتزيدش عن 50 نهائي وكمتوسط بتكون في الاربعينات لو حرارة البروسيسور لسه عاليه, يبقي حتحتاج تغير المروحه بالمبرد, وبالمره هات مبرد قلب نحاس بيكون افضل بكتير من القلب الالومنيوم.

وطبعآ حتتابع صوت المراوح بعد ما تقفل الجهاز, لو لسه في اي مروحه صوتها عالي, يبقي حتحتاج تغير المروحه ، وارد انك بعد ما تقفل الجهاز الجهاز مايشتغلش, لو معاك تيستر تقدر تختبر مراحل التحميل, وتشوف فين المشكله, ولو مفيش تيستر ماتقلقش, الموضوع مش حيخرج عن انك تفك الرامات والبروسيسور وتركبهم تاني, وتراجع علي الكابلات.

 

موضوعات اخري قد تهُمك

Leave a Comment

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك، ولكن يمكنك الاعتراض إذا رغبت. موافق قراءة المزيد

Privacy & Cookies Policy