عادت من الظلام – قصة رعب يحكيها لنا حسن شوكت.

الكاتب : Null
258 مشاهده

عادت من الظلام ، هي قصة رعب من وحي الخيال ، يحكيها شاب عنده 37 عام ويروي قصة حدثت منذ 7 أعوام في الشقة المقابلة لشقته ، فإذا كنت من محبي قصص الرعب سوف تستمتع بقصة جديدة لم تسمعها من قبل ، وستستمتع  بهذا العالم الغريب الذي يحاكي الخيال ، ويغوص بك في أعماق بعيدة عن الواقع .


استمتعوا بقراءة قصة عادت من الظلام :


[ عادت من الظلام ]

  • انا اسمي حسن شوكت عندي ٣٧ سنة ساكن في المعادي القديمة.
  • في بيت كده من البيوت القديمة.
  • وكانت العمارة بتاعتنا ٤ ادوار.
  • الشقة اللي قصادنا بقى.. مقفولة بقالها ٧ سنين.
  • وهي دي اللي عاملالنا حالة رعب.
  • كل اللي في العمارة بيخافوا يقفوا ثواني في الدور الثاني.. الدور اللي فيه شقتي وشقة عم سالم ومراته طنط فاطمة وبنتهم يارا ١٧ سنة اللهم يرحمهم كلهم.
  • من اكتر من ٧ سنين حصلت حريقة كبيرة في الشقة دي نتيجة ماس كهربائي … والشقة ولعت كلها
  • بس يارا هي اللي طلعت حية.
  • الحريقة حصلت في المطبخ لاسباب غير معلومة لحد دلوقتي .. بس بيقولوا ماس كهربائي.. المهم ان المطبخ لازق في اوضة عم سالم.
  • وطنط فاطمة كانت معاه.
  • ولان كل شيء تم بسرعة وهما كانوا نايمين مالحقوش يخرجوا من الاوضة ولا حد عرف ينقذهم.
  • كل اللي قدرنا نعمله اننا ننقذ يارا اللي كانت فاقدة الوعي بسبب الاختناق.. وانا فاكر في اليوم ده لما حصلت الحريقة الكهرباء قطعت في العمارة بالكامل.
  • معرفش بقى من الماس ولا المطافي هي اللي فصلته.
  • احنا انقذنا يارا بأعجوبة… لكن الشقة وعم سالم وطنط فاطمة اتفحموا تماما.
  • راحت المستشفى وقعدت هناك يجي شهرين كاملين.
  • وللاسف هما كانوا مقطوعين من شجرة.
  • فكل اللي في العمارة ساهم في علاج يارا و تظبيت الشقة.. بيضناها على قدنا وجبناها اللي يساعدها انها تعيش.
  • حاجات للمطبخ واوضة نوم.. ومافيش عفش بقى.
  • وقولنا ان شاء الله لما تقوم بالسلامة هنتكفل بمصاريفها.. لانها كانت في اولى جامعة كلية تجارة عين شمس.
  • فاتوا الشهرين وخرجت يارا وبدأت تتعايش مع الحياة.
  • ولكنها بعد ما قعدت في شقتها اسبوع تقريبا.
  • بدأنا نحس بحاجات غريبة في تصرفاتها.
  • وبدأت ماتتكلمش كتير.
  • واول مايجي الليل يوم الخميس في نفس توقيت الحريق النور يقطع في العمارة كلها ويارا تصرخ جامد.
  • نجري على الشقة نخبط جامد  ماترودش.
  • ونزعق ونقول افتحي يا يارا افتحي.
  • ونسمع صوت الحريقة وصوت الماس الكهربائي.
  • لحد ما نزوق الباب يتفتح نلاقيها خارجة من اوضة باباها ومامتها في الضلمة بتصرخ.
  • وشكلها غريب نور الموبايلات بينلنا شكل مرعب جدا ليارا قولنا من انعكاس الضوء.
  • وفاجئة نلاقيها يغمى عليها… وتفوق بعد ساعة… بنوديها على اوضتها ونفتح الشبابيك وجيرانها من الستات يفضلوا جنبها لحد ما يجي الدكتور يفوقها.
  • بس الغريبة اننا بنشم ريحة حريق فعلا على الرغم ان مافيش اي اثر لأي حاجة .
  • وكانها شايفة حاجة احنا مش شايفينها وكلام مش مفهوم بنسمعوا منها.
  • يعدي اليوم ويرجع كل شيء لأصله.
  • وكل يوم خميس الساعة ١١ بالليل يحصلها ده.
  • فضلت ع الحال ده حوالي ٣ شهور.
  • وفي اخر مرة سمعنا صوتها بتصرخ وصوت النار والماس وصوت صريخها زاد اوي.
  • لحد ما سكتت خالص.
  • واحنا نزعق و ننادي ونقول يا يارا افتحي ماتردش.
  • كسرنا الباب المرة دي لانه على غير العادة كان معصلج ومش عايز يفتح .. دخلنا لقينا يارا جثة متفحمة ومافيش اي اثر لأي حريق في البيت.
  • واستحالة تكون هي ولعت في نفسها لان النار اكيد هتمسك في الشقة او في اي جزء تاني.
  • والغريب انها اتفحمت بالسرعة دي مابين صوت صريخها ومابين الوقت اللي كسرنا فيه الباب والجثة حتى مش واضح فيها اي معالم.
  • بلغنا الشرطة جت ولقينا ان يارا كاتبة حاجات في كشكول زي ما تكون مذكرات ولان الفضول قاتلني اخدت الكشكول وخبيته.
  • والشرطة شمعت البيت واتأيدت الحادثة ضد مجهول وبشاهدتنا في التحقيقات رفضنا فكرة انها تكون انتحرت.. لانها انسانه تعرف ربنا.. الله يرحمها بقى ويرحم اهلها.
  • انا بقى بعد ما اتفنت والدوشة دي بدأت افتح الكشكول واشوف يارا كاتبة ايه؟؟
  • لقيتها كاتبة … انا مش قادرة من العذاب اللي انا عايشاه… بشوف كل يوم خميس الحادثة بتتجدد قدامي
  • بشوف نفسي فاجئة في اوضة ماما وبابا والنار جاية من المطبخ ع الاوضة بسبب الماس اللي حصل في فيشة الكهرباء بتاعة الثلاجة … هي دايما كانت بتلمس وبابا كان بيصلحها لحد ما عملت ماس يوم الحادثة وحصل اللي حصل.
  • عذابي في اني بشوف الحادثة بحصل قدام عيني.
  • وفي كل مرة كنت بحاول انقذ ماما وبابا على اعتبار ان  انا في حلم او كابوس وبابا وماما هنقذهم وهيعيشوا.
  • لكن كل مرة كنت بشوف بشاعة المنظر.
  • بشوفهم بيتحرقوا وبحاول انقذهم.
  • وهما فاقدين الوعي من دخان الحريق.
  • والنار بتمسك في السرير وبعدين بتمسك فيهم افضل احاول لحد ما بفقد الوعي وبعدين بشوف جيرانا بيجوا وكاني في حلم وبعدين يغمى عليا.
  • والاقي نفسي تاني في نفس الموضوع.
  • بس مرة كده ماما فاقت وحاولت تشدني.
  • او عايزاني انقذها وبابا غايب عن الوعي حاولت لقيت نفسي اتكهربت فأغمى عليا وفوقت لقيت جيراني حواليا.
  • انا خايفة في مرة امد ايديا اتحرق معاهم.
  • ودي كانت اخر حاجة كاتبتها يارا ومن التاريخ اللي مكتوب في المذكرات.
  • ده كان قبل يوم الخميس اللي اتوفت فيه.
  • ودي حكاية من ٧ سنين والغريب فيها ان من وقتها لحد دلوقتي بنشوف كل يوم خميس شبح يارا بيخرج من الضلمة والباب بيتفتح والنور بيقطع في البيت كله ولمدة ساعة كاملة من الرعب.
  • بنسمع صوت النار والماس وصريخ يارا.
  • هي ما بتأذيناش لكن بترعبنا كل يوم خميس الساعة ١١.
  • لدرجة ان بعض جيرانا بيسيبوا البيت في اليوم ده والساعة دي بالتحديد ويرجعوا ع الساعة واحدة.
  • انا واحد من الناس اتعودت على كده ومش بيسب البيت مع اني في نفس الدور.
  • لكني قلقان لاني لسه شايفها في الحلم بتنادي عليا وانا روحت انقذها شدت ايديا و باب الشقة اترزع
  • والدنيا ضلمت.
  • صحيت لقيت شعر ايديا شايط كاني كنت بولع.
  • انا خايف اوي.
  • لان النهاردة الاربعاء وبكرة الخميس.
  • انا عارف ان مافيش حاجة هتمنع قدري.
  • فانا لو مُوت بكرة .. ابقى ادعولي.. سلامو عليكم.

معلومات عن قصص الرعب :


عادت من الظلام


أدب الرعب “horror fiction” نوع خاص جدا من الأدب يهدف من خلال مجموعة من الأحداث المتشابكة إلى إثارة شعور الرعب والخوف ، بصورة عامة لا أحد يعرف متى بدأ هذا النوع من الأدب، ولكن أغلب الباحثين يعتقدون أنه قد بدأ منذ زمن بعيد جدا فقد اكتشف الإنسان منذ القدم الشعور بالخوف ويعتقد أن الأساطير القديمة هي الدليل على ذلك فقد كانت تحتوي على قصص تهدف إلى إثارة الخوف لدى المستمع أو القارئ.

والرعب هو حالة من الحالات النفسية التي توجد بداخل الإنسان ويمكن محاولة إخراجها في سن الطفولة (على الرغم من أن الطفل في شهوره الأولى لا يشعر بالفزع و أيضاً رعب الأطفال أو حتى الكبار هو له مسمى آخر ،مثال:الخوف،الفزع)، و قد يشعر الإنسان بالرعب من أشياء عدة من مثل  الظلام ، الوحدة وقد يترك الرعب في بعض الاحيان آثارا سلبية على الإنسان كالحالات النفسية والتخيلات والهلوسة والتفكير السلبي.

المصدر 


يمكنكم مشاهدة وقراءة قصة آخرى بعنوان الشريحة القاتلة ، فلقد سردنا لكم قصة آخرى من الرعب ، لمحبي هذا النوع من الأدب ، وهذه المغامرة التي تغوص بك في عالم خيالي ، قد يكون محبب لدى البعض للخروج إلي عالم جديد ، مليء بالغموض والمفامرة ، حتى وإن علمت في النهاية أنه لا صحة لما تسمعه .

موضوعات اخري قد تهُمك

Leave a Comment

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك، ولكن يمكنك الاعتراض إذا رغبت. موافق قراءة المزيد

Privacy & Cookies Policy